#MJC
Rabu, 22 September 1976
Ahu sorang tu hasiangan on
Tepatna di RS Susteran Pakkat
Ia dung hurang lobi saminggu Martahi ma Damang Dainang naeng mulak tu Huta ima Huta Ginjang Ala antar dao do Huta Ginjang on sian Pakkat hurang lobi 12 kilometer.
Jadi di tonga dalan tading ma Damang dipudi ala naeng manuhor parbalanjaion siapari, tarmasuk ma i dinalaho manuhor gula manang kopi, ala masa dope di huta i marranggap manang melekmelekan molo adong sorang dakdanak.
Memang biasa na i antar saminggu do lelengna jala ditutup ma i di ari papituhon didok mai tutup ranggap.
Alai Ala sorang di RS do Ahu jadi dung sahat pe tu huta asa dipamasa parranggapon i
Ianggo Dainang torus do ditorushon pardalanionna jala Damang lasso hataridaan dope.
Dung sadia leleng Dainang sahat tu huta di Tonga ni Jabunta na sangap namartua Damang pe sahat ma Alai sian sihadaoan pe nungnga tarida.
Boasa Damamg gabe tung ngolngol marhasahatan tu jabu Ima disiala na gabe humurang sehat Damang Mardalan pe nungnga humurang denggan Mengkat simanjojakna sambariba.
Mulai sian tinghi i Damang torus ma gabe lam tu humurang hasehaton ni pamatang na.
Tepat na di tanggal 11 Desember 1976
Marujung ngolu Damang, dua ma hami tading tadingan ni Damang Ahu ma Anak siampudanna Baoa do hami duakna DUA SONGON PAT NI MANUK
(istilah on sering do hubege uju dakdanak dope Iba satinghi i dibahen gabe tudos-tudos tu hami nadua)
Ia Abang namanodohon Ahu tung dao do jarak nami ima sampulu taon sadari
Alai nangpe songon i tung sopot so mar Ama hami na dua
Dipargogoi Tuhan i do Dainang di na marparmudumudu hami na dua, dipardunghet-dungheti Dainang do laho pasingholahon hami na dua sahat tu parsingholaan SMA
Dung tamat Ahu sian SMEA di taon 1995
Tung balga situtu do hujalo Pasupasu sian Tuhan i di ari Kamis hu jalo ijasah hu sian SMEA Neg Pakkat
Ari Sabtu nungnga mulai karejo Ahu di Pastoran Paroki Pakkat Boasa gabe mulai ari Sabtu ala topek di ari Jumat i ari libur
Dung hurang lobi satonga taon karejo Ahu di Pastoran Pakkat i Ima di ari Jumat tanggal 9 Fenruari 1996 Marujung ma Dainang
Marujung Dainang ndang ala ni parsahiton alai na dibuat sillam do dibalian
Ditinghi ngolu ni Dainang hea do hami marsanghap ni roha laho manulangi maradophon Tulang Ima Tulang Tambunan tu Tukka Ambobi
Alai songon i ma jolo huroa tingkina Sanghap do na boi di tahi hita jolma alai Tuhanta do na patulushon Sanghap namg tahi di uju ngolu ni Dainang ndang boi tarpatupa hami di tinghi i
Tung mansai balga situtu do las ni roha ni Datulang di na manjanghon haroro nami di tinghi i Ia Abang na manodohon Ahu Nungnga be marhasohotan be di taon 1996 Ima boru ni Raja i Raja Marpaung Sian Sialang Buah Serdang Bedagai
Ala sahat tu tinghi i Ndang marianakhon dope Jadi Sada natinembak rarat ma na hona dilehon Datulang tu hami di tinghi i ima
PASAE MATA NI MUAL MANULANGI TULANG MANGALAP TONDI NI ANAK DOHOT BORU ASA MANGHIRAP MA INNA NA DAO, MANJOU NA JONOK
( molo on ima taringot tu sironghap ni badan nang tondi di Ahu)
Dung simpul pasahathon hata Pasupasu nang suang songon i nang di Tangiang sian sude natorop i Laos adong do poda manang Tona ni Datulang tu Ahu sandiri ima Boru aha pe dialap ho Josmar Boru Cina Boru Jawa Boru India Boru nami do i Alai Ianggo Boru Tambunan manamg Boru ni SILAISABUNGAN unang ma nian da Bere
On ma tona manang pangidoan ni Datulang tu Ahu sandiri Boasa gabe adong tona on tu Ahu Ala molo cerita ni Datulang tu Ahu Ima Uju di na marsanghap Dainang dohot Damang di nalaho mamungha pardongan saripeon Diora i Daompung Bao dohot Datulang do ninna na uju i Ala marningot dipoda ni Natua tua ima na adong janji manang padan ni Silaisabungan dohot Sirajaoloan (Nangpe sahat tu tinghi on ndang dapothu dope ntar songon dia do sebenarna taringot tusi)
Alai Dainamg dohot Damang tumuntun lomona Ia diparngoluon nami hira na manjalo di sude oraora ni Daompung nang dohot Datulang tu Dainang dohot Damang
Ima na gabe pogos do hami Pogos dihajolmaon Pogos dihaportibion Sopot so marama so marina.
Horas...
0 komentar:
Posting Komentar